O Feito a Man enche de espectáculos o casco vello de Santigo

Desde este mesmo xoves día 1 de agosto ata o vindeiro día 21 a Cidade Vella compostelá será o escenario ao aire libre da décimo sexta edición do Feito a Man Estrella Galicia, que este ano trae consigo case 50 espectáculos e máis de 35 bandas e artistas. 

O programa foi presentado esta mañá na praza da Quintana coa presenza de Mercedes Rosón, concelleira de Acción Cultural; Ánxeles Porto, por parte da organización (Asociación Cultural Cidade Vella); o responsable de Cultura da Deputación da Coruña, Xurxo Couto; e o representante de Estrella Galicia, Guillermo Fernández.

Como vén sendo habitual, o groso do festival recae nos concertos de pequeno formato realizados nas terrazas dos establecementos organizadores, mais tamén haberá lugar para noites con artistas de maior formato. Así, á parte de rúas como a vía Sacra, a rúa da Orfas, a praza de Feixóo, Tras San Fiz de Solovio ou a rúa de Xelmírez, tamén haberá actuacións nas prazas de Mazarelos, San Martiño Pinario ou Cervantes.

Tal e como é sinal de identidade dende o comezo da propia existencia deste festival, continúa a promover a escena local cunha programación na que se prima o talento de proximidade. Así, poderemos escoitar bandas como Putan Club, Vudú, Blanca Cendán e Suso Alonso, Leo Burke, Manuel Gutiérrez, Pilo Sierra, The Spoonfuls e moitos outros.

Alén disto, outro dos obxectivos do festival é a descuberta de novos talentos chegados de fóra. Por iso, tamén poderemos ver bandas internacionais como os xaponeses Harmonica Creams, o mozambicano Mohammed Yahya, os arxentinos Ecos e Sofía Viola, os colombianos-guineanos La Rueda, os mexicanos Lariferpol, o brasileiro Arthus Fochi, os suecos The Bongo Club ou a Clarence Bekker Band, desde Surinam.

En total, case 50 propostas artísticas diferentes de diversos estilos musicais: pop, rock, blues, jazz, tango, swing, música tradicional galega… E tamén haberá presenza doutras artes e disciplinas, como a maxia, a performance, a poesía, o baile ou o cabaré.