As treboadas que azotaron a provincia de Ourense a comezos desta semana deixaron cuantiosos danos materiais, sobre todo no concello de Monterrei, derrubando muros e cubrindo de lama as rúas das aldeas máis afectadas. Caeron intensas trombas de sarabia que tamén danaron parte dos viñedos amparados polas Denominacións de Orixe Monterrei e Valdeorras. Pero dende os consellos reguladores mandan unha mensaxe de tranquilidade, xa que as treboadas foron localizadas e respetazon a maior parte das zonas produtoras.
Dende o consello regulador da Denominación de Orixe Monterrei aínda están traballando para poder ofrecer estimacións concretas dos danos e consecuencias das treboadas. Confirman que hai viñedos afectados no concello de Monterrei, citando os situados en A Salgueira como algúns dos que levaron a peor parte.
Pero tamén destacan que a sarabia só afectou a zonas puntuais, respetando cinco dos seis concellos amparados pola denominación. Deste xeito, aseguran que “hai viticultores aos que lles tocou moito”, sobre todo aos que teñen os seus viñedos concentrados na zona afectada. Pero recordan que a maior parte teñen a súa produción dividida e só verán lastrada unha parte da súa colleita.
Do mesmo xeito, dende Valdeorras aconsellan non ser alarmistas. Cifran os terreos afectados nun 20% e aínda que recoñecen que hai viñas moi tocadas tamén destacan que a meirande parte dos concellos que compoñen a denominación non se viron danados, polo que as perspectivas para a vendimia poden seguir sendo boas.
Neste caso as parcelas que sufriron o peor das treboadas están nos concellos de Rubiá, O Bolo e O Barco. E incluso aquí moitos dos racimos tan só se viron afectados de forma parcial, podendo salvar o resto con cicatrizantes. O problema sería se a viña se quedara sen folla, xa que non habería fotosíntese e perderiase todo, pero afortunadamente non foi o caso.