Esta tarde rematan as III Xornadas Semana Vitivinícola de Galicia, un evento técnico e divulgativo organizado pola Deputación de Ourense e a Estación de Viticultura e Enoloxía de Galicia (Evega), que se desenvolveu do 5 ao 7 de xuño. O colofón a estar xornadas foi unha mesa parladoiro sobre o Tostado do Ribeiro, un viño naturalmente doce para cuxa elaboración se realiza un proceso de pasificación natural de uvas autóctonas en locais cubertos. E como peche unha degustación dos doces elaborados por Terra do Castelo, Grupo Reboreda Morgadío e Bernardo Estévez.
A programación desta Semana ofreceu unha xornada técnica sobre o rural ourensán para coñecer máis de preto as súas potencialidades desde o punto de vista do tecido agroalimentario. Ademais, o programa incluiu un obradoiro práctico sobre as ferramentas para a comunicación dixital para coñecer as vantaxes do uso das TIC´s e as súas aplicacións ao marketing dixital.
Outras mesas-faladoiro abordaron diversos temas vencellados ao sector da viticultura como o papel da muller no sector do viño, ou escumosos galegos. Todas elas tiveron lugar no salón de actos do Centro Cultural "Marcos Valcárcel" da Deputación de Ourense, con entrada libre.