A Asociación Provincial de Hostalería e Turismo de Lugo (Apehl) está impartindo un curso de axudante de cociña dentro do marco do programa integrado de emprego DIMO Lugo IV, unha iniciativa que a entidade puxo en marcha coa axuda dunha subvención da Consellería de Economía, Emprego e Industria e da que se benefician actualmente un total de 100 persoas en situación de desemprego, procedentes dos concellos de Lugo e Monforte de Lemos, ás que se busca orientar e capacitar para mellorar as súas posibilidades de inserción laboral.
Esta formación, que está a ter lugar no Pazo de Feiras e Congresos de Lugo, programouse como parte do plan de formación inicialmente previsto no marco desta iniciativa.
Un total de 14 alumnos sumáronse a este curso, cuxa impartición se prolongará ata o próximo día 3 de xuño, que busca capacitalos para o traballo de axudante de cociña coa axuda de prácticas profesionais non laborais en empresas do sector da hostalería.