Baixo a lema “Adestra duro, come tenro”, a IXP Ternera Gallega organizará este sábado, 06 de abril, en Madrid unha masterclass co triatleta Javier Gómez Noya, embaixador da Denominación. O campión do mundo de tríatlon impartirá unha masterclass sobre adestramento e preparación deportiva no madrileño centro comercial La Vaguada, na que se prevé participen máis dun centenar de persoas.
Gómez Noya realizará ademais, acompañado polos asistentes, un adestramento persoal ao redor das instalacións do centro comercial.
Para concluír, a Denominación ofrecerá unha degustación da carne que ampara. O programa de “Adestra duro, come tenro”, dará comezo ás 16:00 horas, coa recepción dos corredores e a entrega dos materiais, dando paso a unha firma de autógrafos na que Gómez Noya se fotografará cos participantes.
A continuación, dará comezo a masterclass, que se levará a cabo na Entrada 1 do centro comercial, seguida por un adestramento con Gómez Noya no Parque La Vaguada. Esta xornada de deporte e boa mesa, concluirá cunha degustación de carne de Ternera Gallega á prancha, a partir das 18:30 horas.
Os asistentes a este adestramento seleccionáronse a partir do sorteo que a IXP promocionou durante as últimas semanas desde as súas redes sociais. Esta actividade enmárcase dentro da campaña na que Gómez Noya e a Denominación se uniron para fomentar unha alimentación equilibrada e a práctica do deporte.
Desde o Consello Regulador das IXPs de Carne de Vacún de Galicia, que integra Ternera Gallega e Vaca Galega/Boi Galego, destácase a aposta polo deportista por representar os valores do traballo, o tesón, a competitividade e a perseveranza, tan arraigados na orixe, filosofía e saber facer dos gandeiros de carne galegos.
“A aposta pola alimentación sa e equilibrada, grazas a un produto de máxima calidade; polo deporte e polos hábitos de vida saudables, é unha constante no programa de Responsabilidade Social Corporativa das IXPs de Carne de Vacún de Galicia”, en palabras do seu presidente, Jesús González Vázquez.
Valores que comparte e aplica o triatleta galego nas súas rutinas diarias de traballo marcadas pola valentía, a tenacidade, a competitividade e o sacrificio. Javier Gómez Noya subliña que esta colaboración contribúe a enxalzar a súa figura e hónrao “como embaixador dunha marca de calidade e gran prestixio”.