O director xeral de Gandaría, Agricultura e Industrias Agroalimentarias, José Balseiros, asistiu esta mañá en Madrid á XVI xornada nacional de PYMEs Carrefour 2019, onde se promocionaron os produtos galegos de calidade en xeral. Así, o director xeral lembrou que Aceites Abril foi o galardoado en Galicia o pasado ano nos Premios PYME Carrefour. No día de hoxe escolleuse ao gañador nacional e fíxose unha mención especial á IXP Ternera Gallega, dado o seu peso no mercado.
Balseiros agradeceu o compromiso desta compañía distribuidora na posta en valor dos alimentos do mar e do agro que teñen unha calidade certificada, potenciando tamén o traballo dos pequenos produtores e dos alimentos ecolóxicos, que cada vez teñen máis consumidores. José Balseiros lembrou que en Galicia hai actualmente un total de 35 selos de calidade e destacou o peso que teñen na economía da nosa comunidade e na identificación da marca Galicia, que destaca entre outras cousas pola nosa gastronomía.