Unha representación do concello de Ferrol está este días na cidade de Cádiz, participando como líder de proxecto na xuntaza do programa MMIAH que pretende recuperar e poñer en valor o Patrimonio Marítimo, Militar e Industrial da costa Atlántica Europea.
Nesta xuntanza do Comité de Dirección, o equipo ferrolá terá a ocasión de presentar ao resto dos socios do MMIAH a primeira versión da web do proxecto e as redes sociais do MMIAH, así como a proposta do estudo evolutivo da cidade de Ferrol e propor o desenvolvemento das tarefas planificadas e que perseguen o desenvolvemento dunha estratexia transnacional de turismo inclusivo, dirixido aos cidadáns a través da recuperación do patrimonio marítimo, militar e industrial.
O consorcio do proxecto MMIAH está formado por nove socios de 5 cinco países (Concello de Ferrol e Concello de Cádiz en España; Plymouth City Council e Liverpool City Region no Reino Unido, Pôle Métropolitain Caen Normandie e Ville da Rochelle en Francia; Camara Municipal de *Ílhavo en Portugal; e Limerick City County Council e Cork City Council en Irlanda.)
Ferrol foi pioneira ao concorrer por primeira vez a esta iniciativa, cofinanciado polo Fondo Europeo de Desenvolvemento Rexional (FEDER) no marco do programa de Cooperación Transnacional Atlantic Area.
A iniciativa liderada por Ferrol tivo que competir con outras 425 propostas das que unicamente 100 superaron a criba para a II fase. Neste segundo filtro, 42 candidaturas foron aprobadas, entre elas a proposta ferrolá, e 57 foron rexeitadas. Ao abeiro deste programa, a Ferrol correspondeulle a achega máxima do global de 3,3 millóns: 554.765 euros, dos que os Fondos Feder aportarán o 70% e o 30% restante, provirá do Concello ate sumar un orzamento que se achega aos 700.000 euros.