
Nesta décima edición de Fruit Attraction participan un total de 12 empresas galegas xunto cos consellos reguladores de Agricultura Ecolóxica de Galicia (Craega) e das indicacións xeográficas protexidas Castaña de Galicia e Pataca de Galicia. Así, está presente a industria Val do Traba (Noia), especializada en sidras e doces de froitas, así como hortalizas, algas e licores; e Porto Muíños (Cerceda) que tamén está especializada en algas e vexetais de costa.
A empresa Froitas do Rosal, do concello homónimo, produce mirabel fresco e produtos transformados bio, mentres que as sociedades Horsal SCG (Cambados), Hortícolas Galegas (Xinzo de Limia), Hortoverín (Oímbra) e Legufrut Agro (San Cibrao das Viñas) se dedican ao cultivo de todo tipo de produtos hortícolas. Tamén participa Patatas Conde (Xinzo de Limia), que produce patacas para consumo fresco e industria.
Este incremento débese ao éxito acadado na anterior convocatoria, que contou cun total de 1.600 empresas expositoras e 70.000 profesionais de 120 países. “A través deste certame damos a coñecer os produtos de gran calidade que temos nun sector fundamental para a economía galega como é a agricultura”, destacou o director da Agacal, quen sinalou que a promoción dos produtos é vital para chegar a novos mercados e consolidar así o prestixio da gastronomía galega.