Desde este domingo e ata o vindeiro venres 22 de xuño, un total de 117 persoas da provincia maiores de 50 anos poderán desfrutar dunha nova edición do programa "Depotermal", organizado pola Deputación de Pontevedra.
Máis polo miúdo, esta semana participarán na modalidade con pernoita ata 33 veciñas e veciños que sairán dos concellos de Forcarei, Cerdedo e Meis. Todas e todos eles aloxaranse en réxime de pensión completa, con acceso diarios aos circuítos termais, dende este domingo e ata o vindeiro venres, no Balneario Eurostars Illa da Toxa.
Pola súa banda, na modalidade diúrna, participarán 84 persoas que virán dos concellos de Tui, Vigo e Pontevedra. Estas veciñas e veciños acudirán durante cinco días, dende o luns 18, a gozar dos circuítos termais do Hotel Galatea e do Balneario Termas de Cuntis.
O programa de termalismo e saúde da Deputación de Pontevedra ten por obxectivos promover o envellecemento activo e mellorar a calidade de vida das persoas maiores, impulsar o establecemento de novas relacións sociais, favorecer a participación en actividades que melloren o seu estado anímico, potenciar espazos de encontro e intercambio de experiencias e evitar o illamento e situacións de soidade. Ademais, o programa tamén permite dinamizar a economía da provincia, impulsando a creación e o mantemento de postos de traballo no sector turístico durante os períodos de menor actividade, desestacionalizando, así, a demanda.
Ao igual que nas anteriores edicións, "Depotermal 2018" conta con dúas modalidades: unha diúrna, mediante a que as persoas beneficiarias asisten aos establecementos termais durante cinco días consecutivos, e outra con pernoita, a través da que se ofrece unha estancia de seis días e cinco noites. Da asistencia diúrna vanse aproveitar 1.180 persoas, mentres que con pernoita haberá 2.878 persoas. En total, son 4.058 persoas beneficiarias. Deste total de prazas, a institución provincial financia integramente máis de 400 prazas para que familias en situación e/ou risco de exclusión social se poidan beneficiar deste programa.