Investimento para a transformación cárnica

A conselleira do Medio Rural, Ángeles Vázquez, na súa visita empresa Celtaverde, en Taboada (Lugo), responsable do matadoiro do concello lugués, desvelou que o sector da carne ten previsto realizar importantes investimentos na nosa comunidade a través das axudas de transformación e comercialización que xestiona a Xunta e para as que hai un orzamento de 29,1 millóns de euros para este ano. 

En concreto, son 29 as propostas de mellora presentadas por empresas de carácter cárnico a esta convocatoria de axudas, o que representa xa o 24% das solicitudes, só por detrás do ámbito lácteo que ocupa o 27%. En orzamento, as iniciativas destes emprendedores supoñen un investimento superior aos 27,6 millóns de euros en Galicia. Trátase dun importante aumento co respecto ao ano pasado, polo tanto non só falamos dun maior número de proxectos a desenvolver na nosa comunidade senón que estes tamén son de maior dimensión. 

Precisamente a empresa Celtaverde foi beneficiaria destas axudas en anos anteriores. En concreto, dende 2012 a 2017 puido ir renovando as súas instalacións en Taboada, grazas ás achegas da Xunta. En concreto, neste período recibiu máis de 171.661 euros para un investimento de preto de 393.000 e cos que conseguiu diferentes melloras: dende un túnel de conxelación, a equipamento informático, pasando por reformas para garantir a eficiencia enerxética. 

A conselleira do Medio Rural felicitou aos propietarios desta empresa de carácter familiar polo seu afán emprendedor e de seguir mellorando para así facer máis competitiva a compañía. De feito, Ángeles Vázquez sinalou que este é un dos obxectos destas axudas, apostar pola transformación e comercialización dos produtos que se producen en Galicia para aumentar o seu valor e así os ingresos das industrias. 

Celtaverde constituíuse no 2004 e a día de hoxe conta con sete traballadores no matadoiro, que ademais de sala de despece conta tamén cun área para a elaboración de preparados cárnicos. Traballa con bovino, porcino, ovino e caprino. Destaca porque sacrifica e comercializa animais inscritos no Consello Regulador da Agricultura Ecolóxica de Galicia (Craega). Ademais xa iniciou os trámites para comercializar elaboradores frescos en ecolóxico.