Buscar/Hemeroteca

miércoles, 14 de marzo de 2018

Ternera Gallega en cifras

A Indicación Xeográfica Protexida Ternera Gallega creceu no campo e consolidou as súas cifras de mercado durante o ano 2017. Así o asegurou o seu presidente, Jesús González Vázquez,, ao salientar que ao peche do 2017, as principais magnitudes de Ternera Gallega víronse consolidadas con crecementos no número de animais rexistrados (un 6%), superando por primeira vez as 133.000 cabezas, e de explotacións gandeiras inscritas (un 1,1%), acadando as 8.249 explotacións, a pesar do contexto de descenso de efectivos no rural. 

A certificación de carne tamén experimentou un lixeiro incremento (un 0,5%) con máis de 94.000 canais, manifestándose un certo equilibrio entre as categorías Ternera Gallega e Ternera Gallega Suprema. Baixo o amparo da IXP comercializáronse 20.657 toneladas de carne, cifra similar á do anterior exercicio, o que se valora como unha consolidación das cifras de mercado despois de varios anos de crecemento. 

O valor económico da carne comercializada, en primeira venda (entre a industria e a distribución), foi de 118 millóns de euros, moi similar ao do ano 2016, xa que tamén foron similares o volume de carne producida e os prezos de mercado. Así mesmo, os prezos en orixe flutuaron moi pouco respecto ao ano anterior e foron bastante estables ao longo de todo o exercicio 2017.

No apartado da industria, o número de matadoiros e salas de despece é casi constante, xa que forman parte da IXP practicamente todas as existentes en Galicia, mentres que o número de comerciais cárnicas varía segundo a dinámica do mercado.

Por outra banda, máis de 80 persoas asistiron en Santiago de Compostela á primeira presentación pública da carne certificada pola nova Indicación Xeográfica Protexida Vaca e Boi de Galicia. Este acto, que foi organizado polo Consello Regulador das IXPs de Carne de Vacún de Galicia, contou coa asistencia da conselleira do Medio Rural, Ángeles Vázquez, e da directora xeral de Gandaría, Agricultura e Industrias Agroalimentarias, Belén do Campo, xunto con membros do pleno do Consello Regulador, profesionais da produción, da industria cárnica e da distribución, gastrobloggers, medios de comunicación e representantes da Administración autonómica.

No hay comentarios: