O último pleno da Deputación da Coruña celebrado o pasado venres 28 de xullo xa aprobou por unanimidade o convenio, que establece a cesión do uso do Pazo de Arenaza por parte do Concello de Oleiros á Deputación, que converterá o espazo nun coworking. Agora, o deputado de Promoción Económica e Emprego, José Luis García García, e o alcalde de Oleiros, Ángel García Seoane, asinaron un convenio de colaboración para a súa rehabilitación.
250.000 euros destinará a institución provincial para as obras, que consistirán na reforma e reconfiguración dos 780 metros cadrados cos que conta o inmoble, para ofrecer espazos de traballo para 25 empresas, ademais de salas de reunións, zona de fotocopiadoras, áreas de descanso, aulas de formación e outros espazos comúns para asegurar o desenvolvemento de todo tipo de accións formativas e de eventos empresariais. O Pazo de Arenaza leva sen estar en servizo desde o 2013, polo que presenta diversas carencias que tamén serán reparadas, coma as filtracións de auga. Así mesmo, cambiarase a caldeira para o posibilitar a calefacción mediante gas natural.
O proxecto de creación deste espazo coworking inscríbese no Plan de Emprego Local (PEL) da Deputación Provincial, dotado con 30 millóns de euros durante o período 2016-2019 para estimular a creación de novos postos de traballo nos sectores público e privado e apoiar as iniciativas emprendedoras nacidas na provincia.
Está previsto deixar un espazo diáfano a disposición das empresas, para que poidan crear zonas temporais de "pop-up store", expoñer os seus produtos, realizar obradoiros e talleres ou incluso facer probas e prototipos para os seus negocios.
O proxecto contempla a adecuación de todos os espazos para facilitar a súa utilización por parte de persoas con mobilidade reducida, todo elo conservando as características arquitectónicas do inmoble, catalogado coma Elemento de Interese Histórico Artístico, Arquitectónico e Ambiental.