Os mellores viños da XVIII Cata Oficial de Valdeorras, iniciativa enmarcada na celebración da XX Feira do Viño na que participaron 13 bodegas da comarca cun total de 31 referencias distintas (18 marcas de tinto e 13 de branco) resultaron ser, en brancos,1º Premio- Casal Novo de Adega O Casal S.A.T; 2º Premio- Viña Abad de Bodega Cooperativa Jesús Nazareno e 3º Premio- Cepado Godello de Adega Cepado S.L.
En tintos, 1º Premio- D´Berna de Guitián y Blanco S.C., 2º Premio- Viña Costeira Mencía de Viña Costeira S.C.G., 3º Premio- Cepado Mencía de Adega Cepado S.L. A mención especial “viños doutras añadas” foi para Garnacha Vella da Chaira do Ramiriño 2015 de Bodega Sampayolo S.L.
O presidente en funcións do Consello Regulador, Francisco García, expuxo a necesidade de “articular circuítos turísticos arredor do viño en Valdeorras” no discurso que pronunciou con motivo da inauguración da XX Feira do Viño da comarca perante a conselleira do Medio Rural, o vicepresidente da Deputación de Ourense e o alcalde do Barco. O acto inaugural contou, ademais, coa participación do actor Javier Veiga en calidade de pregoeiro do foro.
“En Valdeorras temos a gran sorte de posuír un patrimonio natural, histórico e cultural que ofrecer, como pode ser o caso das nosas singulares covas, que teñen un gran valor antropolóxico e nas que se segue a elaborar viño. Todo isto unido a unha ampla oferta de restauración, cunha gastronomía autóctona, que non deixa indiferente a ningúen”, abondou García.
Por iso, é importante –proseguiu- “afondar na creación de circuítos turísticos específicos e permanentes arredor do viño, propoñendo e desenvolvendo actividades diversas, e promocionalos en diferentes puntos xeográficos para favorecer a chegada de enoturistas ao noso territorio, para que poidan disfrutar de todos os nosos atractivos”.