Nunha primeira toma de contacto entre os responsables das áreas de Turismo e Economía da Deputación da Coruña, Xosé Regueira e Antonio Leira, e o da recén creada Asociación de Concellos do Camiño de Santiago, Manuel Mirás -tamén alcalde de Oroso- que agrupa a 14 dos 18 concellos polos que discorre o Camiño Inglés, acordouse que a asociación canalizará as propostas e ideas dos distintos municipios polos que discorre o itinerario para facerllas chegar á area de Turismo da Deputación, que comprometeu manter o apoio que vén prestando á promoción do Camiño.
O obxetivo é dar aos concellos deste itinerario xacobeo o protagonismo que merecen na promoción desta ruta, que conecta os portos de Ferrol e A Coruña co corazón de Compostela; tal como se fixo no ciclo de activididades "Primavera no Camiño Inglés", que por primeira vez reuiniu en Betanzos, o pasado mes de abril, aos dezoito municipios.
Ademáis institución provincial promocionará o Camiño Inglés na feira Fairway que se celebrará este outono en Compostela e noutras feiras turísticas nas que a institución provincial participa ao longo do ano.
A Asociación de Concellos do Camiño Inglés ofreceu á Deputación participar nas asambleas e reunións da entidade, con voz pero sen voto. Unha proposta que a entidade planea facer chegar tamén á Xunta de Galicia, co obxecto de implicar a ambas administracións na planificación e desenvolvemento de accións que contribúan a impulsar este itinerario. O deputado de Economía, Antonio Leira, representará á Deputación da Coruña nas reunións da entidade.