Turismo de Galica destina un millón de euros ao Camiño Francés

A directora de Turismo de Galicia, Nava Castro, e os alcaldes e alcaldesas dos concellos galegos do Camiño Francés asinaron un convenio de colaboración en virtude do cal a Xunta de Galicia aportará máis de 1 millón de euros para a conservación, promoción e mantemento desta ruta así como para impulsar a cooperación entre todos estes concellos polos que pasa este itinerario xacobeo en Galicia.

Como indicou Nava Castro durante o acto, trátase dun convenio plurianual para os anos 2017, 2018 e 2019 e que comprende actuacións nos concellos de Arzúa, Melide, Monterroso, Palas de Rei, Paradela, Pedrafita do Cebreiro, O Pino, Portomarín, Samos, Sarria e Triacastela.

Recordando que o ano pasado Galicia pechou con 277.854 peregrinos- unha cifra histórica que supera o dato acadado no último Xacobeo 2010- e, deles, o 63% escolleron o Camiño Francés, a responsable de Turismo da Xunta advertiu que é este un factor clave para converterse nunha das rutas que precisan un valor máis alto de protección así como unha atención continuada aos peregrinos.