As 15 Cidades Patrimonio continúan co seu plan de promoción e captación de
viaxeiros europeos coa participación no Salón Mundial do Turismo que se está a celebrar en París.
O Salon Mondial du Tourisme de París é a feira
de turismo máis importante das que se realizan en Francia e este ano conta coa
presenza de 1.110 expositores, cunha previsión duns 110.000 visitantes que
buscan inspiración e información para as súas viaxes. Un excelente escaparate no
que as Cidades Patrimonio dispoñen dun espazo propio dentro da caseta de
Turespaña, cuxa coordinación corre a cargo da Oficina Española de Turismo de
París.
Segundo datos de Turespaña, os principais factores valorados polos viaxeiros
franceses á hora de elixir destino internacional son o descubrimento de
culturas, o prezo e o clima. Neste aspecto, a imaxe de España está consolidada
como destino cultural (só por detrás de Italia) e de sol e praia, e mantense
como destino internacional preferido dos franceses cunha cota de mercado do 17%
sobre o total de viaxes internacionais, seguido de Italia (12,3%), Reino Unido e
Alemaña (6% ambos).
España é o seu destino preferido para vacacións en
familia e vacacións debido a que ofrece servizos e infraestruturas de calidade,
unha ampla diversidade de actividades en destino e prezos alcanzables
(TourHebdo) e ademais valórase moi positivamente o estilo de vida
español.
Tras un 2016 moi positivo para o sector turístico español, o Plan Operativo do
Grupo para 2017 continuará coa liña de promoción, representación e
comercialización das nosas 15 cidades baixo o selo de calidade excepcional que
outorga formar parte da lista de Patrimonio Mundial de Unesco.