A conselleira do Medio Rural, Ángeles Vázquez, defendeu a aposta pola calidade nas producións agroalimentarias, así como por impulsar a súa comercialización nos diferentes mercados, para darlle unha adecuada saída aos produtos do agro. Fixo estas consideracións durante a súa visita á empresa aceiteira galega Aceites Abril, situada no concello ourensán de San Cibrao das Viñas.
Esta industria recibiu nos últimos anos axudas da Xunta por valor de 6,1 millóns de euros para un investimento total que supera os 20 millóns de euros, destinado á realización de melloras tecnolóxicas e á ampliación de capacidade e das súas instalacións, entre outras finalidades.
Aceites Abril emprega arredor dun cento de traballadores e a súa facturación anual rolda os cen millóns de euros. A súa capacidade de produción sitúase nos 130 millóns de litros ao ano. Comercializa, baixo diferentes marcas, aceite de oliva virxe extra, de bagazo 95%, de xirasol e de sementes e márcase como obxectivo para o ano 2018 chegar a exportar máis de 34 millóns de litros (hoxe en día exporta uns 15 millóns).
Por outra banda, Ángeles Vázquez, destacou a importancia de promover a produción alimentaria artesanal como xeito de poñer en valor os produtos de calidade do agro galego. Neste contexto, lembrou que a Xunta está a traballar na creación dun distintivo de calidade para os alimentos artesanais de Galicia a través dun decreto específico, actualmente en exposición pública e que se prevé que entre en vigor ao longo do vindeiro ano.
Por outra banda, Ángeles Vázquez, destacou a importancia de promover a produción alimentaria artesanal como xeito de poñer en valor os produtos de calidade do agro galego. Neste contexto, lembrou que a Xunta está a traballar na creación dun distintivo de calidade para os alimentos artesanais de Galicia a través dun decreto específico, actualmente en exposición pública e que se prevé que entre en vigor ao longo do vindeiro ano.