A Consellería do Mar pon en marcha un proxecto
piloto a través do que está a facer entrega de 5.000 paipais en diversas
confrarías da provincia de Pontevedra coa finalidade de que sexan repartidos
nas praias e, dese xeito, concienciar aos turistas da ilegalidade que supón a
extracción de marisco sen permiso de explotación.
A Xunta puxo en marcha esta iniciativa
atendendo ás demandas do propio sector marisqueiro da confraría da Illa de
Arousa, que solicitaron á Administración iniciativas nos areais para contribuír
a atallar o furtivismo, ante a presenza de bañistas nos areais que extraen
marisco de xeito ilegal.
Estes abanos levan gravado o emblema “Non
vivimos do aire, os mariscadores tampouco” e a través dun texto lembran que os
mariscadores e mariscadoras se dedican todo o ano a cultivar as praias e que é
ilegal coller marisco sen licenza. Deste xeito a Xunta busca apelar á
comprensión da cidadanía que acode a gozar das praias como forma de ocio e
advertir dos prexuízos que ocasiona a extracción ilegal de marisco aos
profesionais do marisqueo.
A Consellería do Mar lembra ademais que o
consumo de marisco extraído e comercializado de xeito ilegal pode supor un
risco para a saúde ao non ter pasado ningún tipo de control que o avale. Por
iso pide á cidadanía que non colla marisco dos areais sen ter un permiso de
explotación e aos consumidores que non adquiran produto fóra das vías legais de
comercialización.