Segundo os
datos do Instituto Nacional de Estatística (INE), no
pasado mes de maio Galicia experimentou un incremento da cifra de viaxeiros
aloxados nos establecementos hoteleiros do 8,2%, rexistrando un total de
371.127, cifra que marca un máximo histórico na nosa comunidade e supera nun
4,9% o dato do último ano Santo 2010.
Subiron
tamén neste pasado mes de maio as pernoitas rexistradas en Galicia, nun 3,9%
neste caso, ata acadar un total de 629.198, a cifra máis elevada dos últimos
cinco anos. É o terceiro ano consecutivo no que Galicia rexistra unha mellora dos niveis de
demanda hoteleira no mes de maio.
A nivel
estatal rexistrouse tamén un comportamento positivo da demanda hoteleira, con
melloras tanto da cifra de viaxeiros aloxados coma das pernoitas que
incrementáronse un 6,7% e un 5% respectivamente.
En termos de
mercado, Galicia incrementou o seu turismo nacional neste mes de maio, tanto o interno,
cun crecemento de viaxeiros do 2,3%, como o receptor nacional, que subiu nun
6,3% neste caso.
Galicia
incrementou o seu turismo internacional nun 4,5% acadando neste quinto mes do
ano un máximo histórico de volume –tanto de viaxeiros aloxados con máis de
150.000 como de pernoitas con preto de 210.000- así como de peso no conxunto da
demanda –supoñendo o 40,8% dos viaxeiros e o 33,4% das pernoitas-.
En canto aos
niveis de ocupación do sector hoteleiro, Galicia rexistrou tamén unha mellora
en relación ao pasado ano, ao incrementarse 1,7 puntos porcentuais, situándose
na cifra máis elevada dos últimos cinco anos. Tamén as tarifas
hoteleiras en Galicia subiron neste quinto mes do ano, un 4,4%.
A mellora
dos niveis de demanda e ocupación neste mes de maio, acontecida nun contexto de
suba dos prezos hoteleiros, permitiu aos establecementos hoteleiros da
comunidade incrementar os niveis de rendibilidade en relación ao mesmo mes de
2014 –o RevPAR subiu un 11,6%.