A Xunta promove
o consumo do leite galego entre a poboación escolar da nosa Comunidade mediante
axudas –cuxa convocatoria publica hoxe o Diario
Oficial de Galicia (DOG)– para a subministración aos alumnos de leite e
determinados produtos lácteos neste ano 2015.
O Fondo
Galego de Garantía Agraria (Fogga), ente dependente da Consellería do Medio
Rural e do Mar, é o órgano competente da concesión e xestión destas axudas. O
importe total ascende a 300.000 euros, sendo financiado por fondos FEAGA (Fondo
Europeo Agrícola de Garantía) e vai dirixido aos alumnos de educación infantil,
primaria e secundaria.
De acordo coa convocatoria publicada hoxe polo
DOG, poden solicitar a axuda o centro escolar, unha autoridade educativa para
os alumnos que teña baixo a súa competencia, o proveedor dos produtos ou unha
organización que actúe en nome dun ou máis centros escolares e que estea
constituída especificamente para tal fin. Os solicitantes deberán ser
autorizados pola directora do Fogga e deberán presentar a solicitude de
autorización antes do 31 de xullo.
As solicitudes de autorización deberán
presentarse preferiblemente por vía electrónica a través do formulario
normalizado accesible desde a sede electrónica da Xunta de Galicia, https://sede.xunta.es. Tamén se poderán
presentar en papel.