A Cooperativa Láctea Galega Feiraco celebrou esta mañá en Santiago de Compostela a II Xornada Técnico-Económica “A produción láctea ante un novo escenario”. No encontro, organizado no Palacio de Congresos e Exposicións de Galicia para achegar a socios, gandeiros e cooperativas a situación actual e o futuro do sector tras a desaparición das cotas lácteas, o director xeral de Feiraco, José Luís Antuña, lanzou unha mensaxe de optimismo aos máis de 600 profesionais do ámbito alí reunidos.
Esta iniciativa enmárcase dentro do Programa de Formación activado pola Cooperativa en 2008 para impulsar a cualificación dos seus socios como base para continuar crecendo e incrementando a súa competitividade dentro do sector.
Antuña fixo referencia ás posibles solucións para tentar facer fronte desregularización de prezos, ben arranxando a escaseza de leite no mercado para evitar a importación de excedentes doutros países; ben mediante a fortaleza na negociación dos prezos, ou traballando na xeración de produtos de valor a través da innovación ou coa mellora das marxes actuando sobre os custos de produción.
Durante a súa intervención afirmou ademais que “en todos os plans estratéxicos Galicia figura como unha zona do mundo óptima para a produción de leite” por iso animou aos socios a continuar traballando, coñecendo os custos de cada explotación e actuando sobre eles. Instou a mellorar a competitividade coidando a sustentabilidade enerxética e optimizando o terreo para lograr unha rendibilidade superior que xere beneficios.
Tamén se profundou na desaparición das cotas, analizando se supón unha ameaza ou unha oportunidade e cales son as actuacións prioritarias da man do coordinador da Asociación Industrias Lácteas de Galicia, Pedro Ramos.