A Xunta
dedica este ano un total de 23 millóns de euros a apoiar a industrialización e
comercialización dos produtos agroalimentarios galegos e outros 4,8 millóns á
promoción e apoio dos produtores das marcas de calidade, para promover a
ampliación produtiva. Así o destacou a conselleira do Medio
Rural e do Mar, Rosa Quintana, durante o acto de entrega do premio Aresa de
Desenvolvemento Rural á Denominación
de Orixe Protexida (DOP) Queixo San Simón da Costa.
A
conselleira felicitou á DO premiada e, en termos máis xerais, puxo en valor o
papel dos consellos reguladores como “garantes do esmerado labor que realizan
os produtores, os comercializadores –na procura de abrir novos mercados– e a
Administración, prestando ese apoio preciso para a promoción dos produtos de
calidade diferenciada”.
No caso
concreto dos queixos galegos amparados cun selo de calidade, Rosa Quintana
destacou o seu pulo económico, que se pon de manifesto con datos como o das
4.000 familias, entre produtores e transformadores, que viven en Galicia desta
actividade, ou os 5 millóns de quilos de produto certificado no último exercicio
contabilizado, cun valor económico superior aos 31,5 millóns de euros.