A Xunta amplía en 2015 o calendario de
feiras turísticas destinadas á promoción global do destino Galicia, de xeito
que ao longo dos vindeiros 12 meses Turismo de Galicia participará en 31
certames sectoriais, catro máis que no ano 2014. Galicia promoverase turisticamente en 20 certames internacionais e 11 nacionais, o que sen dúbida posibilitará
a difusión mundial dos valores turísticos da Comunidade galega.
Como novidade, este ano, Turismo de Galicia reforzará a promoción do
cicloturismo e a práctica da bicicleta todo terreo nos certames Fiets En
Wandelberurs, de Amberes (Bélxica) e Unibike, de Madrid. Ademais, o departamento de promoción turística da Xunta ampliará a
presenza do Camiño de Santiago nos mercados turísticos internacionais coa
presenza na feira Koinè, de Vicenza (Italia), e levará os produtos e servizos
turísticos da Comunidade galega a Canadá, coa participación na feira Tourism
& Travel Show, que se celebrará o mes de outubro en Montreal
Un ano máis, o turismo galego estará presente nos principais mercados
turísticos do mundo, entre os que salientan a Feira Internacional do Turismo de
Madrid, FITUR, en xaneiro; a Internationale Turismus Börse (ITB), de Berlín, en
marzo; ou a World Travel Market (WTM), de Londres, en novembro. Ademais, o
turismo galego estará nos mercados emerxentes de Xapón, na feira JATA; Rusia,
no certame MITT; Brasil, na feira Festuris; ou Finlandia, no certame Matka.
No ámbito español, o turismo galego estará representado en todos os
certames turísticos organizados nos principais mercados emisores para Galicia. Deste xeito, ademais de FITUR, Turismo de Galicia participará nas feiras
de carácter xeneralista Navartur, en Navarra, en febreiro; B-Travel, antigo (SITC) de Barcelona, en abril; e o
Salón de Turismo INTUR, en Valladolid, no mes novembro.