 |
| Reunión do Comité Organizador |
O comité organizador de Turexpo
Galicia reuniuse onte nas instalacións do Consello Económico e Social de
Galicia, en Santiago de Compostela, para avanzar nos contidos da quinta edición
deste salón turístico, a cal se celebrará do 20 ao 22 de marzo na Feira
Internacional de Galicia.
Ao encontro acudiron preto dunha
vintena de representantes de importantes entidades do sector turístico na
Comunidade que respaldaron o salón coa súa presenza. Así, ademais de Nava
Castro e Carmen Pita, directora e directora de promoción da Axencia Turismo de
Galicia, tamén acudiron os concelleiros responsables de turismo de Santiago e
Ferrol, a xefa de servizo de turismo de Ourense e representantes da Sociedade
de Xestión do Plan Xacobeo, Clúster Turismo de Galicia, Deputación de A Coruña,
Asociación Provincial de Axencias de Viaxes de Pontevedra (Avipo), a asociación de propietarios de aloxamentos
de turismo rural Agarimo, Asociación Galega de Turismo Rural (Agatur),
Federación Galega de Turismo Rural (Fegatur), Asociación de Turismo Rural Pazos
de Galicia, Asociación de Empresarios de Hostalería de Lugo, Federación de
Empresarios de Hostalería de Ourense e Asociación de Empresas de Turismo
Activo, Aventura e Natureza (Agetan).
No transcurso deste encontro
abordáronse as novidades da área expositiva do certame, a cal se potenciará coa
celebración da Feira de Festas de Interese Turístico (Festur), que se celebrara de forma paralela á Semana Verde de Galicia, e con
áreas temáticas como a do Camiño de Santiago, na que se “recreará” esta ruta
para envolver ao visitante nun chamativo espazo con presenza da oferta da Vía
da Prata e o Camiño Francés.
Así mesmo, tratáronse, entre outros
temas, o plan de promoción dirixido a potenciais visitantes do salón, os países
de procedencia de interese respecto aos touroperadores que participarán na
recoñecida Bolsa de Contratación de Turexpo Galicia e o seu programa de
actividades. Este último será máis técnico o primeiro día e medio, de acordo ao
carácter profesional do certame durante ese espazo de tempo, mentres que a
partir da tarde do segundo día destacará o seu contido lúdico-turístico
dirixido ao público final, dando gran protagonismo ás festas de interese
turístico de Galicia e clausurando a feira cunha destacada actuación musical.