A Consellería de Economía e Industria pon en marcha unha
nova convocatoria do programa de axudas aos concellos galegos para potenciar as
prazas de abastos, dotada con preto de 3 millóns de euros, co obxectivo de consolidalas
como líderes na venda de produtos frescos e de calidade e impulsar a súa excelencia
con novos e mellores servizos para os consumidores.
Os municipios de ata 70.000 habitantes poderán optar a axudas
para a modernización dos mercados que chegan aos 150.000 euros. Estes proxectos
de mellora poden incluír, ademais da remodelación da estrutura física e das
instalacións de uso comunitario das prazas de abastos, actuacións para a
redución do consumo enerxético ou dos residuos xerados, entre outros.
Os concellos que os
desenvolvan deberán poñer en marcha iniciativas dirixidas ao mentoring
comercial aos praceiros. Estas actividades de formación e asesoramento, que se
apoiarán cunha axuda máxima de 1.800 euros, estarán encamiñadas a aumentar a
rendibilidade do punto de venda mediante técnicas de visual merchandising, a
colocación do produto ou a atención ao cliente.
Co mesmo obxectivo de atraer máis clientela aos mercados,
apóianse con ata 3.000 euros a posta en marcha de actuacións de dinamización e
promoción de vendas por parte dos concellos. Ademais, como novidade primaranse
as iniciativas que inclúan a apertura dos mercados en horario de tarde ou a
incorporación de aparcadoiros.
A iniciativa enmárcase na aposta da Xunta por potenciar as
prazas de abastos galegas, facilitando nos últimos seis anos a mellora de máis
de 80 mercados con apoios por máis de 17 millóns. O Goberno galego, que
traballa na posta en marcha dunha Rede de Mercados Excelentes, impulsa nas
prazas unha venda moderna, con novos servizos, ao tempo que se mantén a súa
esencia, baseada na calidade, a diversidade, e a atención ao cliente.
Neste contexto, ademais do programa destinado a colaborar
cos concellos galegos, tamén se activa a convocatoria de apoios ás asociacións
de comerciantes para a dinamización dos centros comerciais abertos e os mercados
de abastos, dotado con 2,2 millóns de euros.