O Pazo de Feiras e Congresos de Lugo acolleu hoxe a VIII
Xornada Técnica da IXP Ternera Gallega. Enmarcada esta edición no programa conmemorativo
do XXV Aniversario da Denominación, a xornada ofreceu un ano máis exposicións e
conferencias relacionadas co manexo, optimización de procesos, divulgación,
promoción e consumo da carne que ampara desde diferentes perspectivas.
A clausura, a cargo do subdelegado do Goberno en Lugo, Ramón
Carballo; o xefe territorial da Consellería do Medio Rural e do Mar na
provincia, Ramón Losada; e o presidente de Ternera Gallega, Jesús González, deu
paso ao xantar de exaltación para os máis de 400 participantes nas sesións. O apoio
masivo e incondicional dos asistentes demostra, a xuízo do presidente da IXP,
“que o vacún de carne é un sector moi vivo e con futuro.
Un futuro avalado polas boas cifras de negocio acadadas
neste primeiro cuarto de século e que pasa pola apertura a mercados
internacionais, proxecto que acaba de iniciarse. O xefe do Servizo de
Coordinación e Seguimento do Plan de Desenvolvemento Rural (PDR) da Consellería
do Medio Rural e do Mar, Juan Manuel Martínez, situou as Denominacións de Orixe
Protexidas (DOPs) e Indicacións Xeográficas Protexidas (IXPs) neste programa
que ten como base o do 2007-2013, arrancou no presente 2014 e se estenderá ata
o 2020 con oportunidades reais para o sector de vacún de carne en Galicia.
Financiado polo fondo europeo Feader nun 75%, o PDR
contempla varias liñas de axuda específicas para o sector, como as referidas ao
fomento de razas autóctonas en perigo de extinción, o manexo sostible de
pasteiros ou aquelas dirixidas á agricultura para a mellora da biodiversidade
en zonas con limitacións naturais; así como outras transversais destinadas á contratación
de mozos ou a plans de mellora integral de infraestruturas.