A directora de Turismo de Galicia, Nava
Castro, resaltou esta mañá nunha entrevista realizada na Radio Galega as
potencialidades do destino Galicia para atraer a turistas internacionais a
través da diferenciación e a calidade que caracteriza a oferta turística
galega.
Segundo explicou Nava Castro, Galicia
rexistrou en maio un incremento do 33,1% na cifra de viaxeiros aloxados en establecementos extrahoteleiros
da comunidade e un aumento na cifra de pernoitas rexistradas neste tipo de
establecementos do 21,6%. No conxunto da oferta regrada, a cifra de viaxeiros
en maio situouse nos 370 mil, un 14,4% máis que en maio do ano pasado e a cifra
de pernoitas subiu un 9,9%. Este volume de viaxeiros aloxados en maio en
regrado supón o máximo histórico nun ano non Santo.
Ao tempo, destacou que esta suba de viaxeiros
e de pernoitas en Galicia no conxunto dos establecementos regrados supera á
rexistrada no conxunto do Estado, onde tamén medraron os viaxeiros un 5,4% e as
pernoitas un 1,9%.
No conxunto da oferta regrada en Galicia, o
turismo nacional subiu en maio a respecto de maio de 2013 un 3,6% e o
internacional, un 25,5%, no tocante ás pernoitas rexistradas.
A directora de Turismo destacou a suba do
turismo internacional na comunidade. Segundo apuntou, o turismo internacional
acada en maio en Galicia máximos históricos, tanto en volume con preto de 143
mil viaxeiros e 214 mil pernoitas, como de peso no conxunto da demanda, co
32,7% das pernoitas e o 38,6% dos viaxeiros aloxados.