Turismo de Galicia e o Concello do Grove rubricaron un acordo
de colaboración para a celebración da Festa do Marisco do Grove na súa edición
número 51. Dende 1963 celébrase no Grove unha das primeiras festas
gastronómicas da comunidade, fundada polo pontevedrés Cándido Acuña.
A 51 edición da Festa do Marisco do Grove presentouse
recentemente na cidade alemana de Hamburgo, no marco dunha presentación para
touroperadores e prensa especializada alemá sobre as singularidades turísticas
do destino Galicia.
Cómpre ter en conta que Alemaña é o país estranxeiro do que
procederon máis peregrinos en 2013. Un total de 97.042 viaxeiros alemáns
aloxáronse nos hoteis de Galicia ao longo do ano pasado, un 4,7% máis que no
ano anterior. Ademais, Alemaña é despois de Portugal, o segundo mercado
internacional máis importante para Galicia alcanzando o 12% dos viaxeiros
estranxeiros e o 10,5% do total das pernoitas internacionais da Comunidade.