O Diario Oficial de Galicia publica hoxe unha
resolución da Consellería do Medio Rural e do Mar pola cal se autoriza a explotación
do berberecho birollo -una especie moi resistente- nos parques de cultivo mariño localizados no litoral da
Comunidade Autónoma de Galicia.
Tradicionalmente, nas zonas de explotación
marisqueira, extráese berberecho común, especie cun alto interese comercial.
Ambas especies, o berberecho común e o berberecho birollo, coexisten nos bancos
naturais pero o berberecho birollo –como especie acompañante-, sempre tivo
menos interese comercial.
Durante a campaña extractiva do ano 2013
observouse un incremento considerable deste tipo de berberecho nos bancos
marisqueiros. Por este motivo, a resolución, que entra en vigor mañá, autoriza
a explotación desta especie baixo unha serie de condicións, entre elas, que
para o exercicio da actividade o establecemento dispoña do preceptivo título
administrativo habilitante en vigor.
Diversas confrarías de pescadores xa dispoñen
da autorización necesaria para extraer berberecho birollo como especie
acompañante dentro dos plans de explotación de marisqueo e para efectuar a
correspondente venda en lonxa. Esta autorización permite ampliar o rendemento
económico do sector ao sumar unha nova especie con posibilidades comerciais.