O sector cárnico en Galicia, que
abarca máis de 600 empresas, dá emprego a preto de 9.000 persoas e factura uns
1.400 millóns de euros anuais. Dentro da cadea deste sector, a fase de
produción é a que ten maior peso e está concentrada principalmente nas provincias
de Lugo e A Coruña. Estas cifras foron facilitadas pola directora xeral de
Produción Agropecuaria, Patricia Ulloa, na inauguración da Xornada Técnica de
Calidade no sector cárnico, que se está a celbrar en San Cibrao das Viñas.
A directora xeral sinalou que é
necesario difundir a imaxe de calidade asociada á carne galega, xa que “as
propiedades que son percibidas como un atributo de diferenciación para o
consumidor interno, non adquiren a relevancia que se merecen no exterior de
Galicia”. Neste contexto, subliñou Patricia Ulloa, móstrase decisivo o apoio do
Centro Tecnolóxico da Carne ao impulso á I+D+i. Este centro xa ten levado a
cabo proxectos de investigación para a innovación en produtos e procesos, en
materia de caracterización deses produtos ou proxectos para incrementar o valor
engadido na cadea de transformación.
Este escenario de innovación e o
entorno que cada día está máis globalizado require de sistemas de control de
trazabilidade e seguridade alimentaria complexos e, neste eido, Patricia Ulloa
destacou a importancia da futura Norma estatal de Calidade de Derivados
Cárnicos. Este documento derrogará todas as normas de calidade dos produtos
cárnicos existentes ata o momento, o que “contribuirá á simplificación e á
actualización da nosa lexislación, aportando claridade e permitindo unha
industria máis competitiva”.