Unha enquisa realizada pola Área de Estudos e Investigación
de Turismo de Galicia indica que a ocupación media durante a Semana Santa acadou
o 55,7 % para o conxunto dos hoteis en Galicia, superando en 3,4 puntos porcentuais
as previsións iniciais e situándose 9 puntos por riba da ocupación media do
46,4 % rexistrada na Semana Santa do ano pasado en toda Galicia, segundo
informa a Xunta de Galicia.
Segundo os datos deste estudo, apréciase neste período unha
recuperación do turismo nacional ao mesmo tempo que se rexistra un incremento
na rendibilidade do sector. Ademais, rexistrouse unha ocupación máis elevada
nos establecementos de maior categoría, de modo que os hoteis de catro e cinco
estrelas situaron a ocupación media no 69%. No resto das categorías a ocupación
oscilou entre o 48 dos establecementos dunha estrela e o 53 % dos
establecementos de 3 estrelas.
No nivel provincial, Ourense rexistrou unha ocupación media
do 71,7 %. En Lugo a ocupación acadou o 69,9 %. Na Coruña a ocupación situouse
no 57,3 % e en Pontevedra no 48,5 % de media. O 69,5 % dos hoteis consultados
sinalaron que os seus resultados foron mellores ou iguais que na Semana Santa
do ano pasado. O 42,1 % sinala que os resultados foron mellores.