A Xunta de Galicia, na súa aposta pola internacionalización
do tecido empresarial galego como un dos piares do crecemento económico,
destina un millón de euros ao Plan de fomento das exportacións galegas
(Foexga), que este ano impulsará os avances das empresas da comunidade en máis
de 50 mercados exteriores en colaboración coas cámaras de comercio.
No marco do convenio aprobado polo Consello da Xunta, o
Foexga impulsará tanto a posta en marcha de misións empresariais en mercados
prioritarios como as accións de acollida de misións de países que visitan
Galicia con intereses comerciais, así como a presenza das empresas galegas en
grandes feiras internacionais.
A Consellería de Economía e Industria, dentro do
importante esforzo que está a realizar para impulsar a internacionalización das
pemes galegas, incrementa este ano do 60% ao 90% a porcentaxe de apoio ás
empresas que participen nas actuacións previstas no marco do plan, que se
espera cheguen a medio milleiro.
O Plan Foexga, que incide na cooperación entre as empresas
galegas como panca para a súa chegada a novos mercados, complementa os servizos
de apoio que achega a Rede Pexga, á cal a Consellería de Economía e Industria
destina 2 millóns de euros en 2014 co obxectivo de consolidar o importante
labor desempeñado ata o de agora, así como aos diferentes programas postos en
marcha cada ano a través do Igape para promover a internacionalización.