A Xunta acaba de informar das liñas de actuación do
recentemente aprobado Plan de investimentos conxuntos da Eurorrexión (PIC),
grazas ao cal a Comunidade de Traballo Galicia-Norte de Portugal fará fronte ao período de
programación comunitaria 2014-2020.
O Plan de investimentos conxuntos estrutúrase en catro eixes
de traballo, en que o primeiro deles avoga por unha Eurorrexión innovadora que
aposta pola investigación e a transferencia; o segundo dos eixes de traballo
aposta polo emprego, co obxectivo de converter a Eurorrexión nun territorio
atractivo para o investimento produtivo e de fomentar a súa internacionalización
económica.
O terceiro eixe céntrase na Eurorexión coma cabeceira en
calidade ambiental e patrimonio, mediante a posta en valor e a protección do
patrimonio natural e cultural do sistema urbano policéntrico, promovendo a
eficiencia dos recursos ambientais. E o cuarto eixe pretende unha Eurorrexión
que sexa exemplo en que as súas administracións públicas e as súas institucións
estean ao servizo dos cidadáns, promovendo a cooperación transfronteiriza entre
administracións públicas como instrumento eficaz para mellorar a calidade de
vida da cidadanía.