O mandatario galego,
Alberto Núñez Feijóo, afirmou hoxe, tras o Consello da Xunta, que Galicia se
converte na segunda comunidade de España e na primeira do arco atlántico en
contar cun Plan Director da Rede Natura adaptado á normativa comunitaria.
“Acabamos de autorizar o Plan Director da Rede Natura e a declaración como
zonas de especial conservación dos 59 Lugares de Importancia Comunitaria
existentes na comunidade”, adiantou, precisando que o ámbito territorial do
Plan Director corresponde, ademais, de a estas 59 zonas, ás 16 zonas de
especial protección para as aves (ZEPA).
En total, serán case 400.000
hectáreas en 215 concellos, o que supón unha protección de Rede Natura do 12%
do total do territorio da comunidade galega, que poderán ser xestionadas a
través dun marco normativo claro con dous obxectivos fundamentais: a súa
protección efectiva e a harmonización da conservación cos usos e
aproveitamentos necesarios que garantan o desenvolvemento das poboacións
asentadas en Rede Natura.