Un total de
25 meles, pertencentes a 17 industrias envasadoras, e 62 queixos de 40
industrias diferentes participan na XII Cata dos meles de Galicia e na XVI Cata
dos queixos de Galicia 2013, que arrinca mañá no compostelán
Centro Integrado de Formación Profesional en Lamas de Abade (Santiago).
Esta cata anual
de meles e queixos de Galicia está organizada pola Consellería do
Medio Rural e do Mar en colaboración cos consellos reguladores da Indicación
Xeográfica Protexida Mel de Galicia e as catro denominacións de orixe
protexidas queixeiras.
Nesta edición a novidade é a participación de mostras de queixo
“Arzúa-Ulloa curado”. Aos efectos do concurso, o intervalo de maduración
establecido para os queixos que participan neste grupo será dun mínimo de 6
meses e un máximo de 15 meses.
Os meles concursan en dúas categorías; a Categoría A, que abarca calquera dos
meles monoflorais (eucalipto, castiñeiro, silveira e breixo) incluídos no
regulamento da IXP Mel de Galicia e a Categoría B, correspondente aos meles
multiflorais.
Os queixos
que se presenten a concurso –agás o xa referido Arzúa-Ulloa curado– deberán ter
unha maduración, no momento da cata, de entre 15 e 20 días no caso do Queixo
Tetilla e Arzúa-Ulloa; entre 45 e 80 días para San Simón da Costa e, no caso do
Cebreiro, ter unha maduración mínima de 2 días.