Xornadas Viño e Cultura en Ourense

A creación literaria, artística e musical galegas dialogan coa cultura do viño no marco das Xornadas Viño e Cultura, que se realizarán na cidade de Ourense do 8 de outubro ao 10 de decembro co apoio da Consellería de Cultura, Educación e Ordenación Universitaria, a través da Secretaría Xeral de Cultura. 

Logo do seu paso polas cidades de Santiago de Compostela e de Vigo entre os meses de abril e de xuño, o profesor da Universidade de Santiago de Compostela Xavier Castro e a actriz Uxía Blanco propoñen agora en Ourense o achegamento á cultura do viño a través da obra dos creadores galegos Maruja Mallo, Rosalía de Castro, Julio Camba, Ramón María del Valle-Inclán e Álvaro Cunqueiro.

As sesións levaranse a cabo na cafetería do Liceo de Ourense, en horario de 20:00 a 22:00 horas. A obra e a figura de Maruja Mallo centrarán a primeira xornada, que se realizará o martes 8 de outubro. En novembro, Rosalía de Castro e Julio Camba serán os protagonistas, os días 19 e 26 de novembro, respectivamente. As últimas dúas sesións, xa no mes de decembro, dedicaránselles a Ramón María del Valle-Inclán, o 3 de decembro, e o e a Álvaro Cunqueiro, o 10 de decembro.