A directora do Instituto Tecnolóxico para o Control do Medio
Mariño, Covadonga Salgado, destacou esta mañá, en relación ao episodio de
biotoxinas mariñas que hai en Galicia, que todo o molusco que se compra polos
cauces legais de comercialización ten garantidas as súas condicións hixiénico
sanitarias. Neste sentido, fixo un chamamento aos consumidores para que compren
o produto polos cauces legais.
A directora do Intecmar informou de que Galicia está ante un
episodio de toxinas lipofílicas, un fenómeno totalmente natural, que non é
extraordinario e que está controlado a través das rigorosas analíticas que
realiza o Intecmar. Non obstante, Covadonga Salgado sinalou que este episodio
ten a particularidade de ser moi repentino, rápido e virulento, xa que, ademais
de afectar ao mexillón, afecta aos moluscos infaunais (por exemplo, ameixa,
berberecho ou navalla), que adoitan ser os menos afectados normalmente,
puntualizou.
En canto á duración do episodio, a directora do Intecmar
explicou que, en termos xerais, os episodios de toxinas lipofílicas duran
semanas ou meses. Neste caso dixo que polo momento non é posible determinar se
o episodio está na súa cima, pero si que está incrementando, “polo tanto pode
demorarse semanas”, engadiu.