A Universidade de Santiago volve apostar por segundo ano consecutivo por
ofrecer as ‘Aulas activas de cociña’, un proxecto de gastronomía pedagóxica aberto
a toda a cidadanía co que se pretende ensinar a cociñar ao tempo que se achega
unha cultura de hábitos de consumo saudables e se aumenta o coñecemento do
medio e dos produtos.
O programa contempla unhas ‘Aulas activas de cociña’ a desenvolver en
distintas datas ata final de curso con variadas temáticas centradas en produtos
concretos. As clases, cun formato
divertido e con prácticas individualizadas, terán lugar no comedor do Colexio
de Fonseca.
Entre os docentes estarán o profesor do CIFP Compostela (Santiago) Jorge
Carou Horta, con experiencia en restauración en Galicia e Londres e o cociñeiro
e profesor do CIFP Carlos Oroza de Pontevedra, Daniel Pulzoni.
Na organización das aulas tivéronse moi en conta as suxestións dos alumnos
da primeira edición. Haberá dous cursos continuos de 44 horas e distintos
monográficos ao longo dos cuadrimestres, de 6 e 8 horas.