A Xunta participa en Expomar Cabo Verde

A Xunta está presente na Feira Expomar Cabo Verde para afianzar os lazos comerciais pesqueiros e socioeconómicos entre Galicia e o país africano. A Consellería do Medio Rural e do Mar está presente por primeira vez na segunda edición desta feira cun stand de 36 metros cadrados, que albergará ás empresas galegas do sector pesqueiro e aos organismos presentes no evento.
O departamento que dirixe Rosa Quintana dá un impulso á promoción dos produtos pesqueiros de Galicia albergando no seu stand a 5 empresas e organismos galegos. O secretario xeral do Mar, Juan Maneiro, visitará as instalacións o venres e o sábado, co obxectivo de difundir os produtos pesqueiros galegos, chegar a novos mercados e ampliar as súas posibilidades de negocio.


A feira celébrase no país africano do 25 ao 27 de outubro. O obxectivo do evento é potenciar o aproveitamento integral das numerosas posibilidades que o mar proporciona e promover a competitividade do sector marítimo.