A ocupación en xullo nos campamentos de turismo de Galicia
incrementouse nun 1,8%. De xeito que no mes de xullo aloxáronse nos campamentos
galegos un total de 70.511 viaxeiros, o que implica unha suba con respecto ao
mesmo mes de 2012 do 2,8%. Rexistráronse en total no mes de xullo 261.055
pernoitas, un 0,1% que en xullo do ano pasado. Segundo matizou, “se temos en
conta os datos rexistrados nos cámpings de Turismo de Galicia nos sete
primeiros meses de 2013 observaremos un incremento da cifra de viaxeiros entre
xaneiro e xullo de 2013 do 2,6% a respecto dos sete primeiros meses de 2012”. En total, aloxáronse neste período nos cámpings galegos un
total de 97.775 viaxeiros que realizaron 354.623 pernoitas –un 0,6% que as
rexistradas de xaneiro a xullo de 2012-.
Estes datos foron facilitados pola directora
de Turismo de Galicia, Nava Castro Domínguez, durante a súa intervención na Asemblea Galega
de Cámpings que se celebrou no Cámping As Cancelas de Santiago de Compostela.
Nava Castro manifestou que coa aprobación por parte do Consello da Xunta do
proxecto de decreto polo que se establece a ordenación dos campamentos de
turismo “damos cumprimento ao noso compromiso adquirido co sector neste eido”.
Ao tempo, a directora de Turismo incidiu nas novidades relacionadas coa
simplificación administrativa que se recollen no novo texto como o eliminado do
selado de prezos -sendo substituído por
unha axeitada publicidade dos mesmos-, a obriga de contar coa figura dun director
ou directora e as contías mínimas nos seguros de responsabilidade profesional.