A Comisión de valoración acordou propoñer á
Dirección de Turismo de Galicia, a concesión de axudas a 23 proxectos
presentados á Resolución pola que se establecen as bases reguladoras para a
concesión en réxime de concorrencia competitiva, de subvencións a entidades
privadas para incentivar o turismo mediante a dotación de equipamento para
empresas de servizos turísticos complementarios na Comunidade Autónoma de
Galicia publicada no Diario Oficial de Galicia o 13 de maio do 2013.
Todos os proxectos refírense a actividades de
turismo activo ou deportivo na que Galicia ten un gran potencial ao posuír as condicións
idóneas para a práctica destas. Entre os proxectos máis destacados están os
referidos as actividades náuticas como son o surf, kitesurf, windsurf, paddle board, vela e kaiak entre outras, aínda que tamén son
destacables as referidas a outras actividades como o cicloturismo, rafting, golf e equitación.
O importe total da concesión de axudas é de
140.566,57 euros e as porcentaxes de subvención oscilan entre o 25% e o 40%
dependendo das puntuacións acadadas por cada proxecto segundo os criterios de valoración
descritos no artigo 9 do anexo I da Resolución.
O obxectivo destas axudas é estimular a
modernización das infraestruturas a través da dotación e renovación de
equipamentos para contribuír á mellora da calidade das empresas de servizos
turísticos complementarios e en consecuencia, ao impulso da actividade
turística en xeral.