A conselleira do Medio Rural e do Mar, Rosa
Quintana, asegurou que a unión do sector do mar, da administración e dos
científicos é a única garantía de éxito para o futuro da pesca en Galicia. Díxoo en Santiago durante o acto de presentación da XV edición da Feira monográfica
náutico pesqueira Expomar, que terá lugar no concello lucense de Burela do 23 ó
26 de maio.
A titular do Medio Rural e do Mar destacou a evolución
desta feira bienal dende os seus inicios ata converterse na actualidade nun referente
para todos os profesionais do mar da cornixa cantábrica e do norte de Portugal.
Na súa intervención, a conselleira tamén
salientou o aumento no número de expositores da presente edición, o cal
cualificou de logro da organización, “porque, que unha localidade de 10.000
habitantes como é Burela reúna un evento destas características non é
casualidade, se non que é froito do traballo constante de toda a xente que fai
posible este evento, o que demostra que os galegos sabemos sacar proveito do
noso e somos quen de servir de exemplo organizativo”.