Galicia promociona o turismo de reunións

A Xunta de Galicia, a través da Secretaría Xeral para o Turismo, presenta a oferta turística de Galicia relacionada co Turismo de Reunións no evento Meet & Talk, destinado especificamente ao mercado británico. Neste evento turístico, que se celebra dende onte e ata mañá sábado en Xibraltar, Galicia promocionarase como destino turístico para a organización de congresos ante os operadores turísticos británicos máis senlleiros.

En Meet & Talk, técnicos de turismo de Galicia manterán xuntanzas de traballo cos máis dunha vintena de operadores turísticos ingleses baixo o formato de workshop.

O Turismo de Reunións en Galicia ten experimentado un notable desenvolvemento durante os últimos anos, debido, en parte, ao incremento e mellora das infraestruturas precisas para a organización de congresos, convencións e viaxes de incentivo.

 Galicia conta con tres pazos de congresos nas cidades da Coruña, Santiago de Compostela e Vigo e outras instalacións susceptibles de acoller eventos no resto das cidades galegas.

Por outra banda, o Xacobeo,  dependente da Secretaría Xeral para o Turismo da Xunta de Galicia,  representa dende hoxe ao destino Galicia ata o vindeiro domingo na 24ª edición da feira de turismo Holiday World Show que abriu as súas portas en Dublín, no recinto RDS Simmonscourt.   


A feira está dirixida a profesionais e a público en xeral e está organizada pola empresa irlandesa Business Exhibition Ltd. e a Asociación Irlandesa de Axentes de Viaxe (ITAA).  Na súa anterior edición de 2012, rexistráronse máis de 50.000 visitantes, 1.500 deles profesionais  e 700 expositores de 70 países diferentes.