Consello Regulador da I.X.P: Pataca de Galicia Protexida organizou en Xinzo de Limia unha Xornada de divulgación do Proxecto de Desenvolvemento
de Produtos Esterilizados, Pasteurizados e pratos preparados (V gama) a partir
de pataca con IXP Pataca de Galicia. O
obxectivo básico de dito proxecto, iniciado no ano 2010 é desenvolver unha gama
de produtos que permitan usar a Pataca de Galicia como un ingrediente
importante de produtos listos para o consumo, xa sexa soa, ou en combinación
con outros produtos galegos de calidade.
O proxecto, dirixido polo Consello
Regulador da IXP, baixo a dirección do seu secretario, Ricardo Losada
Blanco, conta coa colaboración do grupo de Deseño de Produtos e Procesos para o
Desenvolvemento Rural da Universidade de Compostela, dirixido polo profesor
Enrique Arbones, que actuou como poñente na xornada de divulgación, e a empresa
Droguería Agrícola S.A.
A xornada contou coa participación de produtores, envasadores de pataca así como técnicos relacionados co sector, que
expuxeron os resultados acadados ata a data para a pataca pasteurizada e
esterilizada en tarro. Tratáronse os estudos de mercado realizados
con pequenos consumidores e
consumidores colectivos e a análise da canle comercial. Describíronse os
traballos de desenvolvemento de procesos realizados polo equipo da Universidade
de Santiago na planta piloto da Escola Politécnica Superior de Lugo.