Os establecementos
hoteleiros de Galicia rexistraron en novembro un lixeiro crecemento na demanda hoteleira
dun 2,5% do volume de viaxeiros aloxados, cun total de 181.230 viaxeiros
segundo datos facilitados polo Instituto Nacional de Estadística (INE). Este
incremento da demanda vén provocado por unha mellora do turismo receptor, e
dicir, do mercado nacional procedente de fóra de Galicia e do estranxeiro
–ambos mercados rexistran crecementos interanuais do 4,5% nas pernoitas-.
Do mesmo xeito,
produciuse un incremento das pernoitas nos establecementos hoteleiros – hoteis
e pensións-, do 1,1%, cun total de 383.891. As pernoitas na categoría de hoteis
exclusivamente incrementáronse un 4,1% a respecto das rexistradas no mesmo
período do ano anterior. É a primeira vez desde o mes de decembro de 2010 que
Galicia rexistra un incremento interanual das pernoitas hoteleiras. Sobe tamén a
ocupación nos establecementos hoteleiros, en concreto, 0,36 puntos porcentuais
con relación a 2011.
No mes de novembro, Galicia segue rexistrando
un crecemento do turismo internacional nos establecementos hoteleiros
rexistrando un incremento do 2,1% no relativo aos viaxeiros aloxados (con
25.669 no conxunto da comunidade) e do 4,5% nas pernoitas (con 55.701en total).
No acumulado do ano, de xaneiro a novembro,
contabilizáronse un total de 715.528 viaxeiros extranxeiros, que significa un
aumento do 1,8% do turismo internacional. A cifra das pernoitas neste período
cifrouse nun total de 1.263.928.
O incremento do turismo
internacional prodúcese esencialmente nos hoteis, onde sobe un 1,6% a cifra de
viaxeiros aloxados e un 2,1% as pernoitas. O peso do turismo internacional no sector hoteleiro
foi do 23,4%, (en viaxeiros aloxados), máximo histórico neste período e que
supón un incremento de 1,42 puntos porcentuais máis en relación ao ano pasado.