A Consellería do Medio Rural e do Mar vén de
elaborar a primeira guía de servizos náuticos do conxunto do litoral de
Galicia, que edita a Comunidade Autónoma. A titular do departamento autonómico,
Rosa Quintana, presentou esta mañá a publicación gratuíta, que aglutina
información dos 39 peiraos deportivos da comunidade, 27 xestionados pola Xunta
a través de Portos de Galicia e 12 dependentes das Autoridades Portuarias do
Estado e que se pode descargar dende hoxe en internet.
A guía, a primeira
que reúne información do conxunto do litoral, coordinando portos autonómicos e
de interese xeral, referencia concretamente as dársenas náutico recreativas de
Ribadeo, Viveiro, Ortigueira, Ferrol (3), Ares, Sada (2), A Coruña (5),
Camariñas, Muxía, Muros, Portosín, Cabo de Cruz (Boiro), A Pobra do Caramiñal,
Ribeira, Vilagarcía de Arousa, Vilanova de Arousa, Combarro, Pedras Negras (O
Grove), Portonovo, Sanxenxo, Pontevedra, Marín, Beluso (Bueu), Moaña, Cangas,
Vigo (4), Baiona (2) e Tui.
Trátase dunha
publicación que recolle información útil para o navegante. Entre o seu contido
destaca a información de contacto e ubicación de cada clube náutico e o seu
xestor, así como un relatorio de todos os servizos dispoñibles para o usuario e
datos de acceso e comunicacións. Como valor engadido, na guía figura tamén unha
referencia turística da contorna de cada peirao de modo que se incremente o
atractivo do litoral galego de cara aos visitantes marítimos.