A cría de
troita e de rodaballo xerou en Galicia 95 millóns de euros no 2011 e supón 790
postos de traballo directos. Destas cifras, 15 millóns de euros e máis de 250
empregos directos correspóndense coa troita de acuicultura, mentres que a cría
de rodaballo supuxo 80 millóns de euros e dá emprego directo a 540 persoas. Así
o salientou a conselleira do Medio Rural e do Mar en funcións, Rosa Quintana,
na Coruña durante a clausura da xornada ¿Cómo
te alimentas? Salud y gastronomía en los pescados de crianza, organizada pola
Asociación Española de Productores de Acuicultura Continental (ESACUA) e a
Asociación de Productores de Rodaballo de Galicia (AROGA), con motivo do Día da
Acuicultura.
Durante a
súa intervención, a titular do Medio Rural e do Mar incidiu na importancia da
acuicultura en Galicia e apelou á unión de asociacións, consumidores e
administracións para impulsar esta actividade. Neste sentido, lembrou que a
acuicultura se configura como a opción para cubrir a demanda de peixe e marisco
do futuro, xa que, segundo a FAO, se a demanda de peixe e a poboación continúan
nas mesmas porcentaxes de crecemento, no 2030 serán xa necesarios 37 millóns de
toneladas adicionais de peixe para manter os niveis actuais.