Un total de 17
meles pertencentes a 13 industrias envasadoras da Indicación Xeográfica
Protexida (IXP) Mel de Galicia, e 57 queixos das Denominacións de Orixe
Protexida (DOP) Queixo Tetilla, Arzúa-Ulloa, San Simón da Costa e Cebreiro
participan hoxe e mañá nas catas oficiais que organiza a Consellería do Medio
Rural e do Mar en colaboración cos consellos reguladores, e que se celebran no
compostelán Centro Integrado
de Formación Profesional, en Lamas de Abade.
Este concurso consolídase como un dos máis importantes na
nosa Comunidade, tanto polo volume de marcas que participan como por abranguer
ás catro DOP de queixo que existen en Galicia, así como a IXP Mel de Galicia.
Finalizadas
as catas, procederase á identificación das mostras premiadas, tomando nota das
marcas e industrias, introducíndose logo o nome dos galardoados en sobres
pechados que permanecerán en poder do secretario ata o momento da entrega de
premios.
Os
participantes na Cata de Meles concursan, na Categoría A, pola Distinción de Ouro;
mentres que na Categoría B o fan polas Distincións de Ouro, Prata e Bronce. A
cada un dos seis finalistas faráselle entrega dun diploma acreditativo e ás
industrias envasadoras premiadas entregaráselle un trofeo que identifique o
posto acadado (1º, 2º ou 3º).
No caso da
Cata de Queixos, a organización outorgará un trofeo que identifique o posto
acadado aos tres queixos mellor puntuados das distintas denominacións. A
entrega de premios realizarase no mes de decembro.