O Diario
Oficial de Galicia (DOG) publica hoxe a solicitude de inscrición no
rexistro comunitario da Unión Europea da indicación xeográfica protexida
Pemento de Mougán.
Unha vez examinada a solicitude pola
Consellería do Medio Rural e do Mar e completada a documentación pola
Asociación de Produtores de Pemento de Mougán, o expediente de inscrición debe
someterse a un procedemento “de oposición” dentro do Estado membro, mediante a
súa publicación no DOG e, posteriormente, no Boletín Oficial do Estado (BOE). Isto significa que, dende o día
seguinte ao da publicación máis tardía de ambas, iniciarase un prazo de dous
meses durante o cal calquera persoa física ou xurídica que posúa un interese
lexítimo e estea establecida ou resida en España poida declarar a súa oposición
á solicitude.
O ámbito xeográfico da IXP Pemento de Mougán
comprende a totalidade do territorio do concello lugués de Guntín. O nome da
denominación “Mougán” é o do topónimo desta parroquia, dende onde partían no
transporte público os pementos destinados ao mercado da capital. As características
deste produto veñen recollidas no propio Diario
Oficial de Galicia.
A inscrición do produto como indicación
xeográfica protexida baséase tanto nas súas características específicas ligadas
ao territorio -por tratarse dun ecotipo de pemento adaptado ás condicións desta
área- como pola súa reputación, fundamentalmente recoñecida no ámbito da
Comunidade.