Os alumnos do curso de
servizos de restauración impartido no Centro de Formación e Cultura
Gastronómica de Hostelería Compostela van comezar as súas prácticas nalgún dos
mellores establecementos hostaleiros da cidade. Esta semana rematan o seu
período de formación académica no centro de Hostelería Compostela. O inicio da súa estadía en prácticas comeza o día 30
e vaise prolongar durante 2 semanas ata acadar as 80 horas prácticas. Os alumnos
do programa porán en práctica os coñecementos adquiridos durante a súa formación
no centro. Este curso, cunha duración total de máis de 600 horas e dirixido a
desempregados, ten como obxectivo a súa inserción no mundo laboral. Así, un
terzo dos alumnos que participa nos cursos impartidos por Hostelería Compostela
consegue atopar emprego.
A hostalería continúa
sendo, a pesar da crise, un dos poucos sectores que segue a xerar emprego. Os
establecementos incluídos no programa de prácticas e que acollerán aos alumnos
son: A Bodeguilla de
Santa Marta, o Restaurante Garum, AC Palacio del Carmen, Caney Araguaney, N.H.
Obradoiro e o Curro da Parra.
Durante estas semanas,
o Centro de Formación e Cultura Gastronómica de Hostelería Compostela acolle un
novo curso básico de servizo de bar e restaurante dirixido a mozos de entre 18 e
25 anos, cunha segunda quenda dirixida a desempregados en xeral. O curso está
enmarcado no Pacto Local polo Emprego e conta coa implicación e colaboración do
concello de Santiago. Os 30 alumnos cursarán 50 horas formativas nas
instalacións do Centro de Formación e Cultura
Gastronómica.